Tərtər rayonunun Suqovuşan qəsəbəsi Murovdağ silsiləsinin ətəyində, Tərtərçayın sahilində yerləşir. 1976-cı ildə istismara verilən və Tərtərçay, Turaqaçay çaylarından daxil olan suların hesabına formalaşan su anbarı Suqovuşanın təbiətinə xüsusi gözəllik qatıb. Suqovuşan qəsəbəsi bahar fəslində əsrarəngiz təbiət mənzərələri ilə diqqəti çəkir. Su anbarını əhatəsinə alan al-əlvan çiçəklərin yaratdığı tablolar insanın ruhunu oxşayır, qəlbə sakitlik gətirir.